Friday 28 January 2011

WORDS to a vegetarian haggis

By popular demand, I have posted the words (in all their wondrous spelling) to my alternative Burnsian address...


To a vegetarian haggis

Fair fa’ your… dishonest, sonsie face,
Great maverick o’ the puddin race!
For veggie folk, ye tak the place
O’ honest meat.
Some think ye truly a disgrace
Nae fit tae eat.

But ithers cannae face yon haggis
That made wi’ fresh sheep’s stomach bag is,
Where hairt and lung and liver clag is,
Mixed up wi’ oats.
For squeamish folk, for them, the snag is
No Rabbie’s quotes.

I dinnae mean tae fash nor clype,
But some folk cannae stomach tripe
And kidney could nae pass their pipe
For fear they choke.
An’ inside pairts o’ every type
Would make them boke.

Frae John O’ Groats tae Howe O’ Fife
Sic sentiment is awfu’ rife
But then they gang an’ tak a knife
Tae sirloin steak.
They dinnae think that flesh had life –
For ony sake.

The animal that’s killed for meat
Has died for us – and gay few greet.
We owe the beast at least tae eat
And no tae waste.
The choice we have tae eat or bleat
Is no just taste.

Hypocrisy puts me on edge.
The squeamish folk, they a’ should pledge
Tae eat from henceforth none but veg
(An’, maybe, eggs and milk).
Frae shrink-wrapped plastic, let them dredge
Your ersatz ilk.

O ye wha untold beasties save,
For whom no sheep its stomach gave
Nor cattle came hame to their grave,
Lang may ye reek.
Or bailt in pot or microwaved,
It’s ye I seek.

O meat-free bairn o’ John MacSween,
Nae life ye tak, nae liver seen,
Nor kidney but the kidney bean
That gies ye hairt.
An’ nuts an’ lentils (red or green),
A’ play their pairt.

Wi’ mushroom, carrot, onion, neep,
Your savour is baith sweet and deep.
It’s sad ye dinnae taste like sheep,
But that is fine.
When frozen, weel for months you’ll keep.
(I bulk-buy mine.)

O sleekit puddin, sonsie-faced,
Though some may think a haggis based
On vegetables, the meat replaced,
Should be unlawful,
I bid the world to tak a taste –
It is nae offal.

© Chris Young

No comments:

Post a Comment